मोठी बातमी - तर हे सर्व संचालक कायमस्वरुपी होणार अपात्र

 News24सह्याद्री -

सहकारी बँकेत अपहार आणि भ्रष्टाचार करणार्‍यांना मोठी चपराक बसणार आहे. बँक, पतसंस्था अथवा मल्टीस्टेट पतसंस्था आणि बँकेत अपहार, भ्रष्टाचार झाल्याचे सिद्ध झाले आणि या अनुषंगाने पोलिस ठाण्यात गुन्हे दाखल झाले असतील तर अशा बँका, पतसंस्थांच्या संचालक मंडळाच्या विरोधात कठोर भूमिका आता केंद्रीय निबंधक कार्यालयाने घेतली आहे. नगर अर्बन बँकेतील कथीत अपहार आणि भ्रष्टाचाराचे प्रकरण रिझर्व्ह बँकेने गांभिर्याने घेतले आहे. या बँकेच्या अध्यक्षांसह, उपाध्यक्ष आणि संचालक मंडळला कायमस्वरुपी अपात्र ठरविण्यात आले आहे. 

याबाबतचे आदेश असिस्टंट कमीशनर डॉ. सत्येंद्र कुमार नायक यांनी आज काढले. याबाबत अर्बन बँकेचे तत्कालीन अध्यक्ष माजी खासदार दिलीप गांधी, तत्कालीन उपाध्यक्ष अशोक कटारिया यांच्यासह संपूर्ण संचालकांना नोटीसा बजावण्यात आल्या असून तीस दिवसांच्या आत योग्य तो खुलासा करण्याचे आदेश देण्यात आले आहेत. खुलाशाने समाधान झाले नाही तर या सर्वांना अर्बन बँकेसह अन्य कोणत्याही सहकारी संस्थेवर संचालक, सभासद म्हणून राहाता येणार नाही. नवी दिल्ली येथील केंद्रीय निबंधकांनी काढलेल्या या आदेशाने आता भ्रष्ट संचालकांना मोठा दणका बसणार असल्याचे मानले जाते.