अवघ्या 50 रुपयांत ‘राधे’, लक्षात येताच दाखल झाली FIR

मुंबई -

सलमानखानचा राधे हा ईदच्या निमित्ताने सलमान खानचा बहुचर्चित चित्रपट ‘राधे : युवर मोस्ट वॉन्टेड भाई’ प्रदर्शित झाला आहे. लॉकडाऊनमुळे हा चित्रपट सध्या ओटीटी प्लॅटफॉर्मसह काही थिएटरमध्ये प्रदर्शित झाला आहे. झी पे पर व्यू प्लॅटफॉर्मवर हा चित्रपट प्रदर्शित झाला आहे. सलमानचा हा चित्रपट पाहण्यासाठी तुम्हाला 249 रुपये खर्च करावे लागतील. हा चित्रपट कोट्यवधी लोकांनी पैसे देऊन पाहिला असला, तरीही हा चित्रपट पायरसीचा बळी ठरला आहे. व्हिडीओ शेअर करुन सलमान खानने आपल्या चाहत्यांना पायरसीपासून दूर राहण्यास सांगितले आहे. परंतु तरीही काही लोक या गोष्टी करणे टाळत नाहीयेत. सलमान खानच्या पोस्टनंतर झी एंटरटेनमेंट एंटरप्राइझने चित्रपटाच्या पायरसीबद्दल मुंबई सायबर सेलमध्ये तक्रार दाखल केली होती. यानंतर सायबर सेलने देखील तपास सुरू केला आहे. त्याने फेसबुक वापरणाऱ्या एका इसमाविरुद्ध एफआयआर दाखल केला आहे.

या फेसबुक वापरकर्त्याने हा चित्रपट बेकायदेशीरपणे डाऊनलोड केला होता आणि त्याचे पायरेटेड व्हर्जन तो व्हॉट्सअ‍ॅपवर अवघ्या 50 रुपयांना विकत होता. या वृत्तानुसार, सलमान खान फिल्म्सच्या मार्केटिंग हेड अपर्णा देसाई यांनी सांगितले होते की, राधे बेकायदेशीरपणे पाच भागात सोशल मीडियावर विकला जात आहे. यानंतर, झीने पायरसीविरोधी एजन्सी एपिक्स सॉफ्टवेयर प्रायव्हेट लिमिटेडशी संपर्क साधला, ज्याने अशा लोकांना मेसेंजरमधून पायरेटेड व्हिडीओ काढण्यास सांगितले. रिपोर्ट्सनुसार अश्विनी राघव नावाच्या एका फेसबुक युजरने पोस्ट केले होते की, तो राधे हा चित्रपट व्हॉट्सअ‍ॅपवर 50 रुपयांना विकत आहे. ही पोस्ट सत्यापित करण्यासाठी झी वितरण कार्यसंघाने त्या व्यक्तीस पकडण्यासाठी सापळा रचत फिल्म मागितली. अश्विनीने त्याला 50 रुपये ट्रान्सफर करण्यास सांगितले. जेव्हा त्याने पैसे हस्तांतरित केले, तेव्हा वापरकर्त्याने त्याला राधेची पायरेटेड आवृत्ती पाठवली. दुसर्‍या अहवालानुसार अश्विनीसह आणखी दोन जणांविरूद्ध एफआयआर दाखल करण्यात आली आहे.