सारीपाट सह्याद्रीचा - पवारांचा कानमंत्र भाजपाची मोट तोडणार

 News24सह्याद्री - 

राष्ट्रवादी कॉंग्रेसचे अध्यक्ष खा. शरद पवार हे जिल्हा दौर्‍यावर येत आहेत. जिल्हा बँक निवडणुकीच्या निमित्ताने या दौर्‍याला महत्व आले आहे. खरे तर बँक निवडणुक ज्या- ज्यावेळी जाहीर झाली त्या-त्यावेळी पवारांचा नगर दौरा होतोच! याहीवेळी तसेच होतंय! त्यात नवीन काहीच नाही. जिल्हा बँकेत विखे विरोधकांची मोट बांधण्यात पवारांची खेळी कायमच यशस्वी ठरलीय! यावेळी तसे होईल की नाही याबाबत साशंकताच आहे. राधाकृष्ण विखे पाटलांनी थेट देवेंद्र फडणवीसांच्या दरबारात बैठक लावली अन् बँकेची निवडणूक भाजपाच्या वतीने लढविली जाणार हे जाहीर केले. त्यामुळेच यावेळी पवार नक्की काय कानमंत्र देऊन जातात याकडे जिल्ह्याच्या नजरा लागल्या आहेत.
खा. शरद पवार यांच्या दौर्‍याचा प्रारंभच अकोलेमधून होत आहे. स्व. यशवंतराव भांगरे यांच्या पुण्यतीथीचे औचित्य साधून आयोजित करण्यात आलेल्या शेतकरी मेळाव्यात पवार मार्गदर्शन करतील. खरेतर याच मेळाव्यात पवार हे पिचड पिता- पुत्रांवर हल्लाबोल करतील. पिचडांची भाजपाप्रेमातून विखेंशी वाढलेली सलगी कळीचा मुद्दा ठरणार आहे. जिल्हा बँकेचे अध्यक्ष राहिलेले सीताराम गायकर हे राष्ट्रवादीकडून म्हणजेच पवारांच्या शब्दावर खुर्चीत बसले. मात्र, विधानसभा निवडणुकीत त्यांनी पिचडांंची साथ धरली आणि आपसूकपणे जिल्हा बँक भाजपाकडे गेल्याचे कागदोपत्री दिसू लागले.

गायकर यांची बँकेतील कारकीर्दच वादग्रस्त ठरली. बँकेत काही गैरप्रकार झाले. त्यात त्यांनी अधिकार्‍यांना पाठीशी घातले. बँक सर्व संचालकांना विश्‍वासात घेऊन चालविण्याचा अलिखीत पायंडा गायकर यांनी मोडला. कर्मचारी भरती प्रकरणात झालेली दुकानदारी आणि त्यातून बँकेची झालेली बदनामी याची किंमत गायकरांना मोजावी लागू शकते. नोकरभरती मध्ये झालेल्या दुकानदारीत त्यांचे नाव चर्चेत आले. नगर तालुक्यातील संचालकाचे नावही चर्चेत आले. राहुरी कारखान्याला दिलेले कर्ज आणि त्यातून बँक अडचणीत येण्याचा जो प्रकार झाला, त्यास सर्वस्वी सीताराम गायकर हेच जबाबदार राहिले. बँकेेचे कामकाज करताना हुकुमशाही पद्धतीने केले गेले. त्यातून अनेक चुकीचे पायंडे पडले. बँकेच्या काही शाखांमध्ये गैरप्रकार झाले. मात्र, त्याबाबत कोणावरही गांभिर्याने कारवाई झाली नाही. उलटपक्षी पाठीशी घालण्याचे काम झाले.

आ. राधाकृष्ण विखे पाटील यांनी थेट  देेवेंद्र फडणवीस यांच्या माध्यमातून जिल्हा बँकेत लक्ष घातले आहे. पक्षाचा विचार करता विखे पाटलांना अकोल्यातून मधुकर पिचड, कोपरगावमधून बिपीन कोल्हे, श्रीरामपूरमधून भानुदास मुरकुटे, राहुरी - नगरमधून शिवाजी कर्डिले, नेवासामधून बाळासाहेब मुरकुटे, पाथर्डीतून आ. मोनिकाताई राजळे, कर्जत- जामखेडमधून प्रा. राम शिंदे, श्रीगोंद्यातून आ. बबनराव पाचपुते आणि नगर शहरातून दिलीप गांधी- अभय आगरकर यांची साथ मिळू शकते. सध्याच्या चर्चेनुसार भाजपा समर्थकांची मोट कायम राहिली तर हे सारे मिळून महाविकास आघाडीच्या कथीत नेत्यांना मोठे आव्हान देऊ शकतात. पर्यायाने हेच मोठे आव्हान शरद पवार यांच्यासमोर असणार आहे.

राज्यातील महाविकास आघाडीची मोट बांधण्यात महत्वपूर्ण भूमिका बजावणारे खा. शरद पवार आणि कॉंग्रेसचे प्रदेशाध्यक्ष महसूलमंत्री बाळासाहेब थोरात यांची भूमिका जिल्हा बँकेच्या निवडणुकीत कायमच निर्णायक राहिली आहे. राजकीय पक्षाचे जोडे बाजूला ठेवत या बँकेत ज्येष्ठ नेते यशवंतराव गडाख यांनी भूमिका बजावली. स्व. भाऊसाहेब थोरात व स्व. मारुतराव घुले पाटील यांच्या भूमिकाही निर्णायक राहिल्या. कॉंग्रेसकडून बाळासाहेब थोरात आणि राष्ट्रवादीकडून स्वत: शरद पवार हे या निवडणुकीचा सारिपाट मांडत असताना शिवसेनेकडून शंकरराव गडाख भूमिका बजावणार आहेत. पवार- थोरात- गडाख यांच्या प्रयत्नांना प्रतिसाद मिळू शकतो. अकोले, संगमनेर, कोपरगाव, पारनेर, राहुरी, नगर शहर, कर्जत- जामखेड, शेवगाव, नेवासा हे तालुके महाविकास आघाडीची बलस्थाने आहेत. या बलस्थानांचा विचार करता महाविकास आघाडीची मोट बांधली गेली तर बँक सहजासहजी ताब्यात येऊ शकते. मात्र, असे असले तरी पवारांच्या नगर दौर्‍यात भाजपाच्या गोटात दिसणार्‍या म्हणजेच विखेंच्या गोटात दिसणार्‍यांना गळाला लावण्याचे काम होऊ शकते. तसे झाले तर ती जमेची बाजू असणार आहे.

निवडणुकीचे चित्र आताशी स्पष्ट होऊ लागले असताना पवारांचा नगर दौरा त्यामुळेच चर्चेत आला आहे. पवारांनी जिल्हा बँकेच्या निवडणुकीत कायमच बेरजेचे राजकारण केेले आणि विखेंना बँकेपासून रोखण्याचा प्रयत्न केला. यावेळीही तसेच काहीसे होऊ शकते. बाळासाहेब थोरात यांचाही यापेक्षा वेगळा प्रयत्न असणार नाही. विखेंना सत्तेपासून रोखण्यास हे सारे सज्ज झाले असले तरी विखेंनीही तोडीसतोड तयारी चालविली असल्याचे दिसते. पवारांच्या दौर्‍यानंतर जिल्हा बँकेच्या निवडणुकीची दिशा नक्की होईल. तूर्तास पवारांच्या दौर्‍याकडे सर्वांच्याच नजरा लागल्या आहेत.