क्रांतीज्योती थोर शिक्षिका सावित्रीबाई फुले यांच्यापुढे नतमस्तक व्हावे लागेल - उद्धव ठाकरे

 

 मुंबई -

क्रांतीज्योती सावित्रीबाई फुले यांनी स्त्री शिक्षणासाठी आपले आयुष्य वेचले त्यांच्या जयंतीनिमित्त मुख्यमंत्री उद्धव ठाकरे यांनी विनम्र अभिवादन केले आहे. सावित्रीबाई फुले यांची जयंती यापुढे सावित्रीबाई फुले शिक्षण दिन म्हणून विविध उपक्रमांनी साजरा करण्याचा निर्णय मंत्रिमंडळाने घेतला असून सावित्रीबाई फुले महिला शिक्षण दिनाच्याही मुख्यमंत्र्यांनी शुभेच्छा दिल्या आहे. मुख्यमंत्री उद्धव ठाकरे यांनी वर्षा निवासस्थान येथे क्रांतीज्योती सावित्रीबाई फुले यांच्या प्रतिमेला पुष्पहार अर्पण करून जयंतीनिमित्त विनम्र अभिवादन केले आहे.

अभिवादन संदेशात मुख्यमंत्री म्हणतात, स्त्रियांच्या जीवनात शिक्षणाची पहाट व्हावी यासाठी महात्मा जोतिराव फुले आणि क्रांतीज्योती सावित्रीबाई फुले यांनी आयुष्य वेचले. त्यासाठी प्रसंगी अनेक यातना, हेटाळणी, हल्ले सहन केले. स्त्री शिक्षणातूनच कुटूंब आणि पर्यायाने समाज पुरोगामी विचारांच्या वाटेवर चालू शकतो, यावर त्यांचा विश्वास होता. आज स्त्री शिक्षणात महाराष्ट्र आघाडीवर आहे. स्त्रियांनीही अनेक क्षेत्रात आपल्या कर्तृत्वाचा ठसा उमटवला आहे. यासाठी आपल्याला क्रांतीज्योती थोर शिक्षिका सावित्रीबाई फुले यांच्यापुढे नतमस्तक व्हावे लागेल, असे मुख्यमंत्र्यांनी आपल्या संदेशात म्हटले आहे.

क्रांतीज्योती सावित्रीबाई फुले यांची जयंती यापुढे राज्यात सावित्रीबाई फुले महिला शिक्षण दिन म्हणून साजरा करण्याचा निर्णय घेतला आहे. त्यासाठी सर्वांना शुभेच्छा देताना आनंद होत आहे. या दिनानिमित्त शालेय शिक्षण विभागाच्या वतीने क्रांतीज्योती सावित्रीबाई फुले यांच्या जीवन कार्याला उजाळा देणारे विविध उपक्रम नव्या पिढीच्या सहभागाने आयोजित केले जाणार आहे.