मी दिल्लीत गेलो त्याचा आणि राजीनाम्याचा काही संबंध नाही - बाळासाहेब थोरात

 मुंबई -

बाळासाहेब थोरात काँग्रेसच्या प्रदेशाध्यक्षपदाचा राजीनामा देणार आणि ते दिल्लीला जाणार असल्याची चर्चा गेल्या काही दिवसांपासून रंगली आहे. पक्षांतर्गत राजकारणामुळे बाळासाहेब थोरात काँग्रेसच्या प्रदेशाध्यक्षपदाचा राजीनामा देणार अशी चर्चा रंगली होती.  बाळासाबेत थोरात यांनी सोमवारी दिल्लीत जाऊन ज्येष्ठ नेत्यांच्या भेटी घेत नाराजी जाहीर केल्याचेही बोलले जात आहे. दरम्यान बाळासाहेब थोरात यांनी या चर्चांवर मौन सोडले आहे. हे वृत्त त्यांनी फेटाळून लावले आहे. मात्र यावेळी त्यांनी सूचक विधान केले आहे.मी दिल्लीत गेलो त्याचा आणि राजीनाम्याचा काही संबंध नाही. माझे दर महिन्याला काही विषय असतात त्यांची चर्चा करण्यासाठी गेलो होतो. मलाही दिल्लीतच ही बातमी समजली, असे ते म्हणाले.

 माझ्याकडे प्रदेशाध्यक्ष, विधीमंडळ नेता आणि महसूल मंत्री या जबाबदाऱ्या असून दिल्लीत जाऊन योग्य प्रकारे त्या सांभाळेन असे सांगितले होते. पण तुम्हाला अजून काही जबाबदारी द्यायची असेल तर माझी हरकत नाही असंही सांगितले होते. ऑक्टोबर महिन्यातदेखील मी कोणत्या जबाबदारीचे विभाजन करायचे असेल तर हरकत नाही असे स्पष्ट केले होते. एच के पाटील काँग्रेसचे महाराष्ट्र प्रभारी झाल्यानंतर त्यांनासुद्धा ही वस्तुस्थिती सांगितली होती. पण अचानक हा मुद्दा का आला याची मला कल्पना नाही. पण जर ती प्रक्रिया सुरु झाली असेल त्याचे स्वागत करतो असे बाळासाहेब थोरात यांनी सांगितले. दिल्लीतील नेत्यांसोबत राजीनाम्याची चर्चा झाली का ? या प्रश्नावर ते म्हणाले की, “दिल्लीत जाऊन मी राजीनाम्याची चर्चा करण्याची काहीच गरज नव्हती. 

एकाच व्यक्तीकडे इतक्या जबाबदाऱ्या आहेत, त्यामध्ये इतरांना जबाबदारी वाटून द्यावी अशी भूमिका कोणी मांडत असेल तर त्यात काही चुकीचे नाही. त्यातच यासंबंधी प्रक्रिया सुरु झाली असेल तर मी स्वागत करतो. मी समाधानी, आंनंदी आहे. मला काही अडचण नाही.राजीनामा दिल्यास प्रदेशाध्यक्षपदी कोणाची निवड व्हावी असे विचारण्यात आले असता त्यांनी सांगितले की, मी कोणाचे नाव पुढे करणार नाही. निर्णय घेताना एकच अपेक्षा असेल की तरुण, धडाडी, काँग्रेसला पुढे नेईल आणि राज्यभर फिरेल अशा कोणत्याही योग्य व्यक्तीला संधी दिली जावी. एच के पाटील यांच्या कामावर आपण समाधानी असल्याचं सांगत त्यांनी नाराजीचे वृत्तही फेटाळले.