जिल्ह्यातील 766 ग्रामपंचायतींची ऑगस्टमध्ये रणधुमाळी

एप्रिलमध्ये सरंपचपदाचे आरक्षण जाहीर होणार, शनिवारी अंतिम प्रभागनिहाय रचना
अहमदनगर । नगर सह्याद्री -
दि. 1 जुलै ते 31 डिसेंबर 2020 या कालावधीत मुदत संपणार्‍या जिल्ह्यातील 766 ग्रामपंचायतींची रणधुमाळी ऑगस्टमध्ये होणार आहे. त्यासाठी सरपंचपदाचे आरक्षण एप्रिलमध्ये जाहीर होणार असून सरपंच हे शासनाच्या नव्या धोरणानुसार सदस्यांमधून निवडण्यात येतील. या ग्रामपंचायतींचा प्रभागनिहाय आरक्षण व हरकतीचा अहवाल मंगळवारी,दि.17 जिल्हाधिकार्‍यांना सादर केला जाणार असून शनिवारी, दि. 21 नागरिकांसाठी प्रभागनिहाय आरक्षण कळणार आहे. दरम्यान, या ग्रामपंचायतींच्या सरपंचपदाचे आरक्षण तहसीलदार जाहीर करणार असून महिला सरपंचाच्या आरक्षणासाठी प्रांताधिकार्‍यांची नियुक्ती करण्यात येणार आहे.

ऑगस्टमध्ये होणार्‍या या 766 ग्रामपंचायतींसाठी 2652 प्रभाग असून एकूण ग्रामपंचायत सदस्यांची संख्या 7226 इतकी आहे. यात सर्वात अधिक ग्रामपंचायती संगमनेर तालुक्यातील 94 इतक्या असून सर्वात कमी ग्रामपंचायती ह्या राहाता तालुक्यातील म्हणजेच 25 इतक्या आहेत. संगमनेर पाठोपाठ पारनेर तालुक्यातील 88 तर, पाथर्डी तालुक्यातील 78, श्रीगोंंदा व नेवासा तालुक्यातील प्रत्येकी 59 व नगर तालुक्यातील 57 ग्रामपंचायतींचा समावेश आहे.

तालुका       ग्रामपंचायत संख्या    प्रभागांची संख्या       सदस्य संख्या
अकोले             52                            115                        441
संगमनेेर          94                            333                        880
कोपरगाव         29                          101                         279
श्रीरामपूर         27                         102                           281
राहाता            25                           110                         301
राहुरी             45                           154                           429
नेवासा           59                           233                          576
नगर             57                           210                          565
पारनेर          88                           325                          786
पाथर्डी           78                          250                          678
शेवगाव        48                          160                          408
कर्जत          56                           195                         516
जामखेड       49                          155                         499
श्रीगोंदा        59                         209                          587
एकूण        766                       2652                         7226